Wayde ki tadap

 

Chot khaa kar aasmaan se jab wo gira
Mujhe shakl apni hi nazar aai oosmein
Ojhal hue sab aankh se sangi – saathi
Sang jeene marne ki jo kal khate the kasmein

Ek baar fir jhoothi wafayen ho gai
Waayde fareb, beshabd sadayen ho gai
Saaya samajh daaman jise madhosh the hum
Tapti garam ooski fizayen ho gai.

Dard ke mare tadap raha tha badan
Dheere – dheere sang lahu tha rista jeevan
Kapkapin si chootti thin har shwas ke saath
Tairti thi jism mein ek ajab si sihran.

Maut ka bhay to nahi tha nayan mein
Chubh koi dukh teer se gahra tha
Chot ke ahsaas se to nahi roya parinda
Par koi toota wayda aankhon mein lahra raha tha
Chatpatate – chatpatate oosne dekha falak ko
Aur bola kya ye hi hain neh ki rasmein

Lo chor ke saare ke saare hi ood gaye
Mud ke tak dekha nahi kya haal mera
Uttar jinme tha nihit har prashn ka
Ab prashn hai kya rakhte wo khayal mera

Shwas ka aawagaman laga hone baadhit
Paanv bhi padne lage kuch dheele se
Putliyan chadne lagi oopar ki jaanib
Dikhne lage sab drishya kale – peele se

Ghayal hota tan to shyad theek ho jata
Man hua ghayal to fir kaise khushal ho
Deh ki peeda se marna hai bahut saral
Bhala neh ki peeda se mrityu kaise saral ho