Paachvi Nazam

 

Kaun kehata hai ki jamane me badlav aaya hain
Kaun kehata hai ki daur me tabdili aai hain
Kaun kehata hai ki insan ne tehajib sikhi hain
Andhere bhage hain , jiwan mein roshani chhai hain.

Sab phijul ki bate hain, aur kuch bhi nahi
Juthi tasalli hai khud ko aur kuch bhi nahi
Sachai kuch aur hai , halat kuch aur hi hain
Bahut ganvaya hai hakikat mein, paya kuch bhi nahi.

Aaj bhi sehro mein, kasbo mein, gavo mein
Kahi mehalo mein ,bangalo mein , sarayo mein
Dekhiye gaur se jayegi chamakati sej par
Jism lutati , khud ki bhichati kitani jawani
Sabka apna - apna matlab , apna apna makshad
Sabke apne  - apne aphsane ,apni - apni kahani

Koi bikati nazar aayegi tar roti ke liye
Koi badan udhadegi tan pe ak dhoti ke liye
Koi baccho ki khatir sharir nuchvayegi
Koi khud ko laga danv pe nakuari payegi
Koi bechegi khud ko is khatir kyoki,
Kisi ke bhai ko , shohar ko ya bap ko
Taraki karani hai, hasil mukam karna hai
Do roti se jo aaram se bhar jata hai
Chamakate sikko ki jhnkar se bharana hai.
Kaun kehata hai ki jamane mein badlav aaya hai
Kaun kehata hai ki daur mein tabdili aai hai
Kaun kehata hai ki insan ne tahajib sikhi hai
Andhere bhage hain , jivan mein roshni chhai hai.

Aaj bhi bakayda kayam hai majahabi junun
Aaj bhi dharmo ke nam pr dange hote hain.
Aaj bhi shiyasat chalti hai kaumo ke dam pe
Aaj bhi kaumo mein bhagavan bante hote hain.

Aaj bhi log ish phirak mein rahate hain ki
Uthe kab majhabi tuphan, kab sehar jale
Kab mile narm jism, beghar najnino ke
Kab shuru ho lutpat , kab daulat mile.
Kab mile mauka apni ranjishe mitane ka
Kab purane badale dil se nikale jaye
Kab jawaniya mile lutf uthane ke liye
Kab padosi ke ghar dake dale jaye.
Kaun kehata hai ki jamane mein badalav aaya hai
Kaun kehata hai ki daur mein tabadili aai hai
Kaun kehata hai ki inshan ne tahajib sikhi hai
Andhere bhage hain, jivan mein roshni chhai hain.

Aaj bhi bhukh havi hai, dekhiye insano par
Aaj bhi log roti ke liye tarashte hain
Aaj bhi is badale jamane ke aangan mein
Kuch hi chulhe hai jo shubah - sham jalate hai.
Aaj bhi dudh mayssar nahi hai baccho ko
Garib aaj bhi bin dawa dam tod jate hain
Aaj bhi hukamrano ke dar pe tabedar dar se
Aaulad apni banakar gulam chod jate hai.
Kaun kehata hai ki jamane mein badalav aaya hai
Kaun kehata hai ki daur mein tabadili aai hain
Kaun kehata hai ki insan ne tahajib sikhi hain
Andhere bhage hai jivan mai roshni chhai hain.

Aaj bhi daur shaho ka, shanshaho ka
Aavam gulam hai aaj bhi kuch khandano ki.
Aaj bhi log jhukate hai sir raub ke aage
Jindagi sasti hai aaj bhi insano ki.
Dilo - dimag pe paisa aaj bhi havi hai
Ahsiyat aaj bhi daulat se toli jati hai
Aaj bhi shaude khule aam eeman ke hote hain
Shadi ke waqt boli aaj bhi boli jati hain.
Kaun kehata hai ki jamane mein badalav aaya hai
Kaun kehata hai ki daur mein tabadili aai hai
Kaun kehata hai ki insan ne tahajib sikhi hai
Andhere bhage hai jivan mai roshni chhai hain.

Ae mere dost ! Aaj kah di so kah di
Aainda bat aisi koi mat kehana.
Ho sake to haqiqat bayan kar dena
Kisi veham mein, galatpfehmi mein mat rehana.
Aaj bhi hum vahi hain jo sadiyo pehale the
Vahi badan , vahi aavaj , vahi khun
Vahi chal, vahi rishte ,vahi mayene
Vahi nazar, vahi umar, vahi paimane.

Bas agar badala hai to sirf itna
Rishte kahi kho gaye hawas ke darimiyan
Eeman bik gaya aish ke chahat mein kahi
Kahi khawaish ke bojh mein dab gaya insan.
Kaun kehata hai ki jamane mein badalav ayaa hai
Kaun kehata hai ki daur mai tabadili aai hai
Kaun kehata hai ki insan ne tahajib sikhi hai
Andhere bhage hai jivan mein roshni chhai hai.